Kids City មជ្ឈមណ្ឌលកម្សាន្តសម្រាប់កុមារ

ភ្នំពេញ: នៅជាប់អគារ Gold Tower 42តាមបណ្តោយមហាវិថីព្រះសីហនុ បច្ចុប្បន្នគេបានសង្កេតឃើញមានអគារមួយកំពុងលេចរូបរាងឡើងដោយគេរំពឹងថាអគារថ្មីនេះនឹងធ្វើឲ្យជីវិតរបស់ក្មេងៗជាច្រើននៅរាជធានីភ្នំពេញមានការផ្លាស់ប្ដូរ។

លោក ម៉េងហៀង ម្ចាស់អគារKids City បានរៀបរាប់ពីអគារនេះថា«ជាមជ្ឈមណ្ឌលកម្សាន្តអប់រំមួយដែលមានបំណងផ្ដល់ការកម្សាន្តសប្បាយ និងការអប់រំដល់កុមារក្រុមគ្រួសារកូននិងឪពុកម្ដាយផងដែរ»។

លោក ម៉េង ហៀងបានប្រកបមុខរបរជាច្រើនដូចជា ហាងលក់សៀវភៅ Monument Books ដែលមានសាខាចំនួន១១កន្លែងនៅក្នុងប្រទេសចំនួនបីព្រមទាំងក្រុមហ៊ុនExotissimo Travel។ អគារ Kids City ដែលមានកម្ពស់១២ជាន់នេះគឺជាការចាប់ផ្ដើមគម្រោងថ្មីមួយរបស់លោក។

ម្ចាស់អគារKids City ខាងលើបានថ្លែងថា៖«មូលហេតុដែលយើងសាងសង់អគារKids City នេះព្រោះនៅរាជធានីភ្នំពេញមិនមានអ្វីច្រើនទេដែលយើងអាចសាងសង់។ នៅរាជធានីភ្នំពេញមិនសូវមានកន្លែងដែលទាក់ទាញឲ្យកុមារទៅលេងកម្សាន្តច្រើនទេបើទោះបីជាមានកន្លែងកម្សាន្ត២-៣ដូចជារមណីយដ្ឋានវត្តភ្នំនិងនៅតាមមាត់ទន្លេក៏ដោយ។ ម៉្យាងទៀតកន្លែងទាំងអស់នោះមិនទាន់មានស្ដង់ដារគ្រប់គ្រាន់ចំពោះសុវត្ថិភាពនិងគុណភាពទេហើយក៏មិនទាន់សមស្របតាមអាកាសធាតុកម្ពុជា នៅពេលមានភ្លៀងកម្តៅថ្ងៃឬក៏ធូលីហុយខ្លាំងនោះទេ»។

លោកបានបន្តថា៖«ដូច្នេះខ្ញុំក៏មានគំនិតក្នុងការបង្កើតមជ្ឈមណ្ឌលកម្សាន្តសម្រាប់ការលេងកីឡាការកម្សាន្តសប្បាយផ្សេងៗ ដែលមានសុវត្ថិភាពនិងមានភាពស្រស់បំព្រងគ្រប់ពេលដោយមិនមានឧបសគ្គនៅពេលមានភ្លៀងធ្លាក់ឬក៏កម្ដៅថ្ងៃ»។

ការចំណាយលើការសាងសង់Kids City នឹងអស់តិចប្រសិនបើគេសង់នៅរាជធានីភ្នំពេញ។ «ប៉ុន្តែបើសិនខ្ញុំបង្កើតសួនកម្សាន្តមួយនៅគិរីរម្យតើមានមនុស្សប៉ុន្មាននាក់ដែលសុខចិត្តចំណាយពេលធ្វើដំណើរពីរម៉ោងទៅដល់ទីនោះដែលអាចមានភ្លៀងដែលធ្វើឲ្យពេលវេលាមួយថ្ងៃកន្លងផុតទៅនោះ? ដូច្នេះយើងជ្រើសរើសសកម្មភាពសំខាន់ដាក់នៅរួមហើយធ្វើឲ្យសកម្មភាពទាំងនោះឲ្យខិតកាន់តែជិតនឹងកន្លែងដែលមានមនុស្សរស់នៅ ដើម្បីបង្កភាពងាយស្រួលរៀបចំផែនការនិងប្រតិបត្តិការរយៈពេលពេញមួយឆ្នាំនិងមានសុវត្ថិភាព»។

ចំពោះការកម្សាន្តវិញ Kids Cityមានការកម្សាន្តជាច្រើនដូចជា«ឡើងជញ្ជាំង ស្គីទឹកកកបាញ់កាំភ្លើងឡាស៊ែរដោយមានកន្លែងធំទូលាយព្រមទាំងមានឧបករណ៍លេងកម្សាន្ត៤៨ប្រភេទដែលនឹងធ្វើឲ្យក្មេងអាចលេងកម្សាន្តរយៈពេលបីទៅបួនម៉ោងប្រសិនបើពួកគេមិនមានការនឿយហត់»។

សម្រាប់មនុស្សពេញវ័យវិញ នៅទីនោះមានហាងកាហ្វេGloria JeansនិងហាងBlue Pumpkinព្រមទាំងហាងជាច្រើន«ដែលមានដាក់លក់សម្លៀកបំពាក់ក្មេងៗឧបករណ៍ផ្សេងៗសម្រាប់ទារក ហើយយើងក៏មានមជ្ឈមណ្ឌលថែទាំក្មេងផងដែរ»។

ទោះបីជាយ៉ាងណានេះគឺវាជាផ្នែកនៃគម្រោងអប់រំមួយដែលមនុស្សជាច្រើនបាននឹកសរសើរដល់លោកម៉េង ហៀង។ «យើងមានអ្វីដែលយើងហៅថាកន្លែងវិទ្យាសាស្ត្រនិងកន្លែងស្រាវជ្រាវវិទ្យាសាស្ត្រ...វានឹងក្លាយជាកន្លែងដាក់តាំងពិព័រណ៍វិទ្យាសាស្ត្រដំបូងដែលមិនធ្លាប់មាននៅភ្នំពេញ។យើងកំពុងធ្វើការជាមួយសាលារៀនជាច្រើនពីព្រោះនៅមុនពេលយើងសាងសង់ផ្នែកវិទ្យាសាស្ត្រនេះយើងបានចែកកម្រងសំណួរស្ទង់មតិជាច្រើនដល់គ្រូដែលបង្រៀនមុខវិជ្ជាផ្នែកវិទ្យាសាស្ត្រដើម្បីទទួលបានគំនិតស្ថាបនាស្ដីពីមុខវិជ្ជាទាំងនោះហើយយើងបានបញ្ជូនគំនិតដែលទទួលបានពីកម្រងសំណួរទាំងនោះទៅឲ្យក្រុមអ្នកជំនាញដើម្បីដាក់បញ្ចូលនៅក្នុងបញ្ជីនៃការដាក់តាំងពិព័រណ៍នៅពេលកម្មវិធីនេះបើកពួកគេអាចធ្វើកម្មសិក្សាបាន»។

លោកបានបន្តថា៖«យើងរំភើបចិត្តខ្លាំងណាស់ចំពោះផលវិជ្ជមានពីកន្លែងវិទ្យាសាស្ត្ររបស់យើងពីព្រោះមានប្រទេសជាច្រើននៅលើពិភពលោកបានចាត់ទុកផ្នែក វិទ្យាសាស្ត្រគឺជាផ្នែកមួយនៃកម្មវិធីរបស់រដ្ឋាភិបាលហើយវាត្រូវបានផ្ដល់មូលនិធិដោយក្រសួងអប់រំឬក៏រដ្ឋាភិបាលតែម្តង។ ប៉ុន្តែនៅកម្ពុជាយើងពេញចិត្តនឹងចែករំលែកកន្លែងនេះដល់ក្មេងៗហើយខ្ញុំត្រូវនិយាយថា ប្រសិនបើខ្ញុំមិនមានឱកាសធ្វើដំណើរទៅបរទេសខ្ញុំនឹងមិនស្គាល់អ្វីគ្រប់យ៉ាងពីវិទ្យាសាស្ត្រនោះទេ ព្រោះការអប់រំខ្ញុំគឺត្រូវបំផ្លាញដោយសង្គ្រាមស៊ីវិលនៅរបបខ្មែរក្រហមដូច្នេះខ្ញុំគិតថា វាក៏អាចផ្ដល់ឱកាសច្រើនដល់ឪពុកម្ដាយសម្រាប់ការស្រាវជ្រាវផ្នែកវិទ្យាសាស្ត្រផងដែរ»។

តែទោះបីជាយ៉ាងណា លោក ម៉េង ហៀងបានបដិសេធមិននិយាយអំពីការចំណាយរបស់គម្រោងនេះទេដោយលោកថ្លែងថា៖«យើងពិតជាមិនទាន់បូកសរុបការចំណាយរបស់យើងទេខណៈតាមការព្យាករដំបូងឃើញថាអស់តិចប៉ុន្តែយើងបានធ្វើអ្វីលើសពីនោះដូច្នេះអ្វីៗអាចកើនឡើងថែមទៀត។ ត្រង់ចំណុចនេះខ្ញុំនឹងមិននិយាយអ្វីទៀតទេរហូតទាល់តែយើងបិទបញ្ជី»។

លោកបានបង្ហើបថា៖«វាជាការបណ្ដាក់ទុនដ៏ធំមួយព្រោះយើងបានប្រើប្រាស់ឧបករណ៍ថ្លៃៗដូចជាឧបករណ៍លេងកម្សាន្តផលិតនៅទីក្រុងManchester (ប្រទេសអង់គ្លេស) សម្ភារក្នុងសារមន្ទីរនាំចូលមកពីប្រទេសប៊ែលហ្ស៊ិក និងនូវែលសេឡង់ស្គីទឹកកកនាំមកពីអាមេរិកសម្ភារឡើងជញ្ជាំងនាំមកពីនូវែលសេឡង់ដូច្នេះសម្ភារមួយចំនួនពិតជាមានតម្លៃថ្លៃណាស់។ យើងក៏មានឧបករណ៍បង្វិលខ្លួនការជិះកង់លើខ្សែនិងជិះបាល់ឡុងផងដែរ»។

នៅពេលសួរអំពីអគារ Gold Tower 42 លោក ហៀង បានឆ្លើយថា«ខ្ញុំមិនដឹងទេ។ ខ្ញុំគ្មានអ្វីត្រូវនិយាយទេ។ ខ្ញុំមិនដឹងថាតើអ្នកណាជាម្ចាស់អគារនេះទេ ហើយអ្នកណាជាអ្នកសាងសង់នោះទេ។ នៅពេលយើងចាប់ផ្ដើមរៀបចំផែនការសម្រាប់គម្រោង Kids City នេះយើងមិនដឹងថាតើពួកគេនឹងបញ្ចប់វានៅពេលនោះទេ។ និយាយឲ្យត្រង់ទៅគឺមានរយៈពេលជិតពីរឆ្នាំហើយដោយអ្វីៗនៅតែដដែលខ្ញុំមិនបានដឹងព័ត៌មានអំពីវានោះទេ។ ខ្ញុំគ្រាន់អាចនិយាយថា នៅក្នុងទីក្រុងដ៏ស្រស់ត្រកាលនេះប្រភេទអគារដែលមិនទាន់សាងសង់រួចនេះមិនគួរទុកចោលបែបនេះទេព្រោះមិនមែនជារឿងល្អឡើយសម្រាប់មុខមាត់ទីក្រុង»។

អគារKid Cityដែលមានទំហំ៧ ០០០ម៉ែត្រការ៉េគ្រោងនឹងបើកឲ្យដំណើរការជាសាធារណៈនៅខែឧសភានេះគឺពិតជាមិនមានអគារណាមួយនៅទីនេះដូចនឹងអគារនេះទេ។ «នេះជាអ្វីមួយថ្មីចំពោះប្រជាជនកម្ពុជា។ នៅក្នុងទីក្រុងផ្សេងទៀតអ្នកមានសកម្មភាពទាំងនេះនៅជុំវិញអ្នកចំណែកនៅទីនេះអ្នកបានឃើញសកម្មភាពនេះនៅក្នុងកន្លែងតែមួយ»។ ហើយនៅពេលខាងមុខវិញអគារប្រភេទនេះអាចនឹងមាននៅទីក្រុងយ៉ាំងហ្គោន ប្រទេសមីយ៉ាន់ម៉ា»។

ទស្សនៈរបស់លោក ម៉េងហៀងជាទស្សនសាមញ្ញមួយដោយលោកបានលើកឡើងថា «ជាទូទៅ ជោគជ័យគឺអាស្រ័យលើមនុស្សទាំងអស់គ្នានៅជុំវិញយើង។ខ្ញុំគិតថា យើងធ្វើការជាមួយពួកគេដោយភាពរាក់ទាក់តាមរយៈការគ្រប់គ្រងការធ្វើអំពើល្អនិងការបណ្ដុះបណ្ដាលដែលអំពើល្អទាំងអស់នេះនឹងជួយឲ្យអ្នកទទួលបានជោគជ័យ»៕ PN

source : postkhmer

Kids City មជ្ឈមណ្ឌលកម្សាន្តសម្រាប់កុមារ

11 April, 2013

1.6K

Kids City មជ្ឈ​មណ្ឌល​កម្សាន្ត​សម្រាប់​កុមារ​

11 April, 2013

1.6K

Kids City មជ្ឈមណ្ឌលកម្សាន្តសម្រាប់កុមារ