ភ្នំពេញៈ ធនាគារ​ពាណិជ្ជ S E. Sun របស់​តៃវ៉ាន់​បាន​ប្រកាស​ពី​ផែនការ​ទិញ​ភាគ​ហ៊ុន​៧០​ភាគរយ​របស់​ធនាគារ​ពាណិជ្ជ​សហពាណិជ្ជ​របស់​កម្ពុជា​(UCB)​ ក្នុង​តម្លៃ​៦៩,៣៣​លាន​ដុល្លារ។
ការ​ទិញ​នឹង​ធ្វើ​ឡើង​បន្ទាប់​ពី នីតិវិធី​ក្នុង​កិច្ច​សន្យា​ត្រូវ​បាន​ចប់​សព្វ​គ្រប់​។ នេះ​បើ​តាម​សេចក្ដី​​ប្រកាស​ព័ត៌មាន​នៅ​ក្នុង​គេហទំព័រ​ភាគ ហ៊ុន​តៃវ៉ាន់​កាល​ពី​ថ្ងៃ​សុក្រ​។ សេចក្ដី​ប្រកាស​ព័ត៌មាន​នេះ​បាន​មក​ពី E. Sun Financial Holding (ESFH) ជា​ក្រុម​ហ៊ុន​មេ​ចុះ​បញ្ជី​ក្នុង​ផ្សារ​ហ៊ុន​តៃវ៉ាន់។

លោក Joseph ​Huang ​ប្រធាន ESFH ​ឲ្យ​ដឹង​ក្នុង​របាយការណ៍​តាម​រយៈ​កាសែត​តៃប៉ិ ថែមស៍ កាល​ពី​ថ្ងៃ​សៅរ៍​ថា កិច្ច​សន្យា​នេះ​នៅ​ត្រូវ​ការ​យល់​ព្រម​ពី​និយ័តករ​នៅ​តៃវ៉ាន់​ និង​កម្ពុជា​ផង​ដែរ។

ធនាគារ​តៃវ៉ាន់​មាន​គម្រោង​បើក​សាខា​ផ្ទាល់​ របស់​ខ្លួន​ក្នុង​ប្រទេស​កម្ពុជា​ បន្ទាប់​ពី​ការ​ទទួល​បាន​ភ្លើង​ខៀវ​កាល​ពី​ឆ្នាំ​មុន​ពី​ស្ថាប័ន និយ័តករ​ហិរញ្ញវត្ថុ​តៃវ៉ាន់។ ប៉ុន្តែ​បាន​សម្រេច​ចិត្ត​ទិញ​ភាគហ៊ុន​ក្នុង UCB ជំនួស​វិញ​បន្ទាប់​ពី​ដឹង​ថា​ UCB មាន​គំនិត​ស្រដៀង​គ្នា​អំពី​ការ​អភិវឌ្ឍ​ពាណិជ្ជកម្ម​។ នេះ​បើ​តាម​លោក Huang។

លោក​ថ្លែង​ថា៖ «ធនាគារ E. Sun មាន​បំណង​ចម្លង​ម៉ូដែល​ពាណិជ្ជកម្ម​របស់​ខ្លួន​នៅ​តៃវ៉ាន់ ​ដើម្បី​ជួយ​ជំរុញ​សមត្ថភាព​ជំនាញ​ហិរញ្ញវត្ថុ»។ លោក​បន្ថែម​ថា​ UCB មាន​ទ្រព្យសកម្ម ៣៣០ លាន​ដុល្លារ​គិត​ត្រឹម​ខែ​ធ្នូ ​ឆ្នាំ​មុន​ ធ្វើ​ឲ្យ​វា​ក្លាយ​ជា​ធនាគារ​ធំ​ជាង​គេ​ទី៨​នៅ​កម្ពុជា​ដោយ​មាន​ចំណែក​ទីផ្សារ​៣,២ ភាគរយ។

មិន​អាច​ទាក់ទង​តំណាង​ធនាគារ​ទាំង​ពីរ​បាន​ទេ​កាល​ពី​ម្សិលមិញ។

ធនាគារ ​UCB បាន​បង្កើត​ឡើង​ក្នុង​ឆ្នាំ​១៩៩៤ ​និង​ជា​ធនាគារ​ចុង​ក្រោយ​ដែល​ត្រូវ​បាន​ទិញ​​ភាគហ៊ុន​ដោយ​ធនាគារ​បរទេស។

កាល ពីឆ្នាំ​មុន​សាជីវកម្ម​ធនាគារ​សិង្ហបុរី​នៅ​ភ្នំពេញ និង​ធនាគារ​ឥណ្ឌូចិន OSK ត្រូវ​បាន​ទិញ​ដោយ​ធនាគារ Cathay United​ តៃវ៉ាន់ និង​ធនាគារ​ RHB Capital នៅ​ម៉ាឡេស៊ី​។

លោក Grant Knuckley អគ្គនាយក​ប្រតិបត្តិ​ធនាគារ​ ANZ Royal បាន​ថ្លែង​ថា និន្នាការ​នេះ​ជា​រឿង​ធម្មតា​សម្រាប់​ប្រទេស​កំពុង​អភិវឌ្ឍន៍​ដូច​ កម្ពុជា​ ដែល​មាន​ឱកាស​ច្រើន​ពី​ទស្សន​វិស័យ​នៃ​ធនាគារ​បរទេស​។

លោក​ថ្លែង​ថា ​លោក​បាន​ដឹង​មុន​ថា​ ការ​ទិញ​ជា​ច្រើន​នឹង​កើត​ឡើង​ក្នុង​រយៈ​៥​ឆ្នាំ​បន្ទាប់​ទៀត​។

លោក​បន្ត​ថា៖​ «អ្វី​ៗ​ទាំង​អស់​វា​មាន​ភាព​វិជ្ជមាន​សម្រាប់​វិស័យ​ធនាគារ​ ខណៈ​មូលធន​ថ្មី​ៗ និង​អ្នក​ជំនាញ​ធនាគារ​បរទេស​កំពុង​តែ​ចូល​មក​។ ការ​ប្រកួត​ប្រជែង​នឹង​កើន​ឡើង ប៉ុន្តែ​វា​បង្ខំ​ឲ្យ​ធនាគារ​ទាំង​អស់​ត្រូវ​បង្កើន​នូវ​កម្រិត​ស្ដង់ដារ ទោះ​បី​ត្រូវ​ទទួល​ប្រាក់​ចំណេញ​កាន់​តែ​ទាប​សម្រាប់​វិស័យ​ធនាគារ​ក៏​ដោយ​ »។

លោក​ស្រី ​ងួន ​សុខា​ អគ្គ​នាយក​ធនាគារ​ជាតិ​នៃ​កម្ពុជា​ បាន​ប្រាប់​ភ្នំ​ពេញ​ ប៉ុស្តិ៍​កាល​ពី​លើក​មុន​​ថា​ លោក​ស្រី​មិន​គិត​ថា ការ​រួម​បញ្ចូល​របស់​ធនាគារ​បង្ហាញ​ធ្លាក់​ចុះ​ក្នុង​វិស័យ​ធនាគារ​នោះ​ ទេ។​ លោក​ស្រី​ថ្លែង​ថា៖ «អ្វី​ដែល​យើង​ចង់​បាន​គឺ​លើក​ទឹក​ចិត្ត​ឲ្យ​ធនាគារ​ស្វែងរក​ដៃគូ​ ខ្លាំង។​ យើង​លើក​ទឹក​ចិត្ត​ពួក​គេ​ឲ្យ​រួម​គ្នា ដើម្បី​ឲ្យ​វិស័យ​នេះ​កាន់​តែ​ខ្លាំង ​ដោយ​សារ​តែ​យើង​ស្ថិត​នៅ​ក្នុង​ដំណាក់​កាល​អភិវឌ្ឍន៍​»។ របាយការណ៍​ប្រចាំ​ឆ្នាំ​​របស់​ធនាគារ​បង្ហាញ​ថា ​ប្រាក់​ចំណេញ​របស់​UCB ​មុន​ពេល​កាត់​ពន្ធ​មាន​៤,៤៨​លាន​ដុល្លារ ​ខ្ពស់​ជាង​ឆ្នាំ​២០១០ ​ប៉ុន្តែ​ចំនួន​នេះ​ទាប​ជាង​ឆ្នាំ​២០០៩​ ដែល​មាន​៤,៥៦​លាន​ដុល្លារ៕PB