បន្ទាប់ពីមានការប្រកាសថាកោះតាងអាចនឹងក្លាយទៅជារមណីយដ្ឋានកោះទំនើបប្រណីតទីមួយនៅប្រទេសកម្ពុជាតាមរយៈការវិនិយោគបរទេសក្រោយពី
ការចុះ MOU រវាងក្រុមហ៊ុនពីរគឺ Worldbridge Land របស់ប្រទេសកម្ពុជា និងក្រុមហ៊ុន Nanshan Group របស់ប្រទេសចិនដើម្បីអភិវឌ្ឍគម្រោងនេះអាចនឹងមានតម្លៃជិត ១ កោដិដុល្លារ។ លោកឧកញ៉ា សៀ រិទ្ធី ប្រធាន Worldbridge Land បានបញ្ជាក់ថាការវិនិយោគនេះនឹងប្រព្រឹត្តឡើងបើទោះជានៅមានបញ្ហាក្នុងការប្រតិបត្តិក៏ដោយ។
លោកឧកញ៉ា រិទ្ធី បានថ្លែងថាការវិនិយោគនេះគឺជាជំហានទីមួយទៅក្នុងវិស័យបដិសណ្ឋារកិច្ច «ខ្នាតធំ» របស់ Worldbridge Land។ Worldbridge Land ត្រូវបានគេស្គាល់តាមរយៈគម្រោងខុនដូធំៗពីរនៅទីក្រុងភ្នំពេញគឺ The Peak និង The Bridge។
លោកឧកញ៉ាបានមានប្រសាសន៍ថា៖ «សម្រាប់ខ្ញុំ ខ្ញុំយល់ថាប្រសិនបើយើងងាកទៅមើលការរីកលូតលាស់ផ្នែកសេដ្ឋកិច្ចរបស់រដ្ឋាភិបាល វិស័យទេសចរណ៍គឺជាវិស័យដែល Worldbridge ត្រូវពង្រីកចូលទៅក្នុងនោះ។ ខ្ញុំមិនអាចវិនិយោគនៅតែក្នុងអាជីវកម្មលំនៅឋានប្រណីតនោះទេខ្ញុំក៏ត្រូវតែងាកទៅមើលការវិនិយោគរមណីយដ្ឋានផងដែរ»។
ខណៈដែលកម្មសិទ្ធិកាន់កាប់កោះ និងការវិនិយោគនៅមានលក្ខណៈស្រពេចស្រពិលដោយមានម្ចាស់កោះពីមុនដែលមានសញ្ជាតិរុស្ស៊ីជាប់ពាក់ព័ន្ធនៅក្នុងវិវាទនេះគេបានព្យាករថាក្រោយពីសេដ្ឋីរុស្ស៊ី Sergei Polonsky ត្រូវបាននិរទេសខ្លួនឱកាសក្នុងការវិនិយោគបានលេចចេញជារូបរាងឡើងតាមរយៈការសហការគ្នារវាងវិស័យឯកជន និងវិស័យសាធារណៈដែលត្រូវបានសម្រួលដោយក្រុមប្រឹក្សាអភិវឌ្ឍកម្ពុជា Council for the Development of Cambodia (CDC)។
បើយោងតាមលោកឧកញ៉ា រិទ្ធី លោកបានចរចាកម្មសិទ្ធិរបស់កោះនោះអស់រយៈពេលជាងពីរឆ្នាំមុនបន្ទាប់ពីបានទិញពីអ្នកជំនួញជនជាតិរុស្ស៊ីដែលលោកបានបដិសេធមិនបញ្ចេញឈ្មោះ។ ទោះជាយ៉ាងណាក៏ដោយបញ្ហាបានចាប់ផ្តើមកើតមានឡើងបន្ទាប់ពីលោកបានទិញកោះនេះដោយកោះនេះគឺជាមូលដ្ឋានយោធាជើងទឹកចាប់តាំងពីសង្គ្រាមវៀតណាមមកម្ល៉េះ។
លោកបានបន្តថាពីរខែបន្ទាប់ពីលោកទទួលបានកម្មសិទ្ធិកោះនេះកងកម្លាំងយោធានៅលើកោះបានត្អូញត្អែរហើយទាមទារចង់បានកោះទាំងមូលនោះមកវិញ។
«ខ្ញុំត្រូវតតាំងជាមួយនឹងយោធាគ្រប់ពេលរហូតដល់លោក សុក ចិន្តាសោភា បានគាំទ្រគម្រោងរបស់ខ្ញុំ» ដោយលោកបានសំដៅដល់អគ្គលេខាធិការរបស់ CDC ដែលបានដឹកនាំការចុះហត្ថលេខាលើ MOU ហើយបើយោងទៅតាមទីភ្នាក់ងារព័ត៌មាន AKP បានបង្ហាញថាការយល់ព្រមនេះ «សង្កត់ធ្ងន់ទៅលើការខិតខំប្រឹងប្រែងរបស់រដ្ឋាភិបាលកម្ពុជាក្នុងការអភិវឌ្ឍតំបន់មាត់សមុទ្រ និងកោះក្នុងគោលបំណងទាក់ទាញភ្ញៀវទេសចរបន្ថែម»។
លោកឧកញ៉ា រិទ្ធី ក៏បានពន្យល់ដែរថាជាមួយនឹងការគាំទ្ររបស់ CDC សក្តានុពលនៃការអភិវឌ្ឍកោះនេះមិនត្រឹមតែអាចទៅរួចទេប៉ុន្តែវាថែមទាំងអាចធ្វើទៅបានទាំង «ស្របច្បាប់ និងត្រឹមត្រូវ»។
លោក សុក ចិន្តាសោភា មិនអាចទាក់ទងបានដើម្បីផ្តល់មតិទាក់ទងនឹងគម្រោងវិនិយោគដែលបានលើកឡើងនេះទេ។
លោក ហូ វណ្ឌី អតីតសហប្រធានរបស់ក្រុមការងារទេសចរឯកជន និងវិស័យសាធារណៈហើយបច្ចុប្បន្នជាទីប្រឹក្សារបស់សភាពាណិជ្ជកម្មកម្ពុជាបានមានប្រសាសន៍ថា MOU នេះគឺជា ជំហានវិជ្ជមានមួយក្នុងការអភិវឌ្ឍសក្តានុពលតំបន់មាត់សមុទ្រដែលបានអសកម្មអស់រយៈពេលជាយូរក្រោយពីមានការត្រួតពិនិត្យត្រឹមត្រូវរួចមក។
លោកបានបន្តថា៖ «ពួកយើងសង្ឃឹមថាគម្រោងធំៗមួយចំនួនរបស់ប្រទេសចិនទាំងនេះអាចមិនត្រឹមតែនាំចូលនូវភ្ញៀវទេសចរជនជាតិចិនបន្ថែមទេតែក៏អាចធ្វើឲ្យវាក្លាយទៅជាគោលដៅនៅក្នុងតំបន់សម្រាប់កប៉ាល់ ឬនាវាកម្សាន្តផងដែរ»។
បន្ថែមពីនេះទៅទៀតលោកបានពន្យល់ថាការវិនិយោគនេះគឺជាផ្នែកមួយនៃយុទ្ធសាស្ត្រធំមួយក្នុងការរួមបញ្ចូលសក្តានុពលទេសចរណ៍របស់ប្រទេសកម្ពុជា និងប្រទេស ថៃ តាមរយៈការអភិវឌ្ឍកោះដែលភ្ជាប់គ្នានេះ។
«ការផ្សារភ្ជាប់កោះទាំងនេះមានន័យថានឹងមានការអភិវឌ្ឍបន្ថែមលើកោះទាំងអស់នេះ»។
លោក វណ្ឌី បានកត់សម្គាល់ថាមានកោះប្រហែលជា ២០ ដែលត្រូវបានលក់ទៅឲ្យក្រុមហ៊ុនឯកជនដែលមួយចំនួនធំមិនមានទម្រង់អភិវឌ្ឍច្បាស់លាស់នោះទេដែលជាមូលហេតុនាំឲ្យ CDC ត្រូវចូលពាក់ព័ន្ធ។
ទោះជាយ៉ាងណាក៏ដោយវត្តមានរបស់យោធានៅកោះតាងនៅតែជាឧបសគ្គចម្បងក្នុងដំណើរការដោះស្រាយដែលលោកឧកញ៉ា រិទ្ធី សង្ឃឹមថានឹងអាចទទួលបាន។
លោកបានមានប្រសាសន៍ថា៖ «ខ្ញុំនៅតែត្រូវទៅទីនោះហើយនិយាយជាមួយពួកគាត់។ ដូច្នេះខ្ញុំប្រាប់ពួកគាត់ថាប្រសិនបើពួកយើងអភិវឌ្ឍតំបន់កោះនោះខ្ញុំត្រូវតែផ្តល់ឱកាសការងារ និងប្រាក់ខែ»។ លោកបានបន្តថាដីចំនួន ៤៥ ទៅ ៥០ ហិកតានឹងត្រូវបានផ្តល់ទៅកាន់យោធា។
បើយោងទៅតាមផែនការមេរបស់កោះ។ កោះដែលមានទំហំ ៥១០ ហិកតានេះគឺមានព្រៃឈើចំនួន ៩០ ភាគរយជាមួយនឹងឆ្នេរមាត់សមុទ្រចំនួន ៥ កន្លែងដែលនឹងអភិវឌ្ឍទៅជាកាស៊ីណូសណ្ឋាគារប្រណីតមួយចំនួនមជ្ឈមណ្ឌលលក់ទំនិញ ក្លិបកម្សាន្តរាត្រី កន្លែងចុះចតឧទ្ធមាគចក្រ វីឡាជើងភ្នំ និងមាត់បឹង សាលសន្និសីទ និងទីតាំងសម្រាប់រៀបអាពាហិ៍ពិពាហ៍ដែលកន្លែងទាំងនោះនឹងនៅផ្នែកខាងជើងនៃកោះ។
ព្រៃនៅផ្នែកកណ្តាលនៃកោះនឹងត្រូវបានរក្សាសម្រាប់ការធ្វើដំណើរកម្សាន្តក្នុងព្រៃដោយឡែកតំបន់សម្រាប់ជនបរទេស និងទុកសម្រាប់ផែសេវាកម្ម មន្ទីរពេទ្យ មជ្ឈមណ្ឌលនីតិសម្បទា និងកំពង់ផែ។
ខណៈពេលដែលការចរចាជាមួយនឹងយោធានៅលើកោះកំពុងតែមានដំណើរការលោកឧកញ៉ា រិទ្ធី បានពន្យល់ថាចាប់តាំងពីការចុះហត្ថលេខា MOU មកការសិក្សាស្រាវជ្រាវពីភាពដែលអាចធ្វើទៅបាន បានធ្វើឡើងដោយក្រុមហ៊ុនទាំងពីរហើយអាចនឹងបញ្ចប់នៅខែតុលាឆ្នាំ ២០១៦ ខាងមុខនេះ។
លោកបានបន្តថា៖ «នៅពេលនោះខ្ញុំនឹងទៅទីនោះជាមួយនឹងដៃគូជនជាតិចិនរបស់ខ្ញុំហើយនិយាយជាមួយនឹងយោធាម្តងទៀត»។ លោកបានបន្ថែមថាការសាងសង់អាចនឹងចាប់ផ្តើមនៅដើមឆ្នាំ ២០១៧ ប៉ុន្តែកាលបរិច្ឆេទថ្ងៃបញ្ចប់នៅមិនទាន់ច្បាស់នៅឡើយទេ។
ចំពោះការរៀបចំការដឹកជញ្ជូនសម្ភារវត្ថុធាតុដើមទៅកាន់កោះដើម្បីការសាងសង់វិញលោកបានបញ្ជាក់ថាក្រុមហ៊ុនទាំងពីរកំពុងតែពិចារណាថាតើគួរតែប្រើប្រាស់ផែឯកជនដែលនៅជ្រៅនៅក្នុងសមុទ្ររបស់ Union Development Group នៅកោះកុង ឬផែស្វយយ័តនៅក្រុងព្រះសីហនុ។
នៅពេលដែលសួរអំពីមុខនាទីរបស់ Nanshan Group ក្នុងការវិនិយោគនេះលោកឧកញ៉ា រិទ្ធី ទទួលយកជំនាញឯកទេសរបស់ពួកគេក្នុងការសាងសង់រមណីយដ្ឋានដោយលោកបានលើកឡើងពីការអភិវឌ្ឍនៅខេត្តកំណើតរបស់ពួកគេនៅ Shangdong។ Nanshan Group ក៏បានបើកដំណើរការរមណីយដ្ឋានវាយកូនហ្គោលនៅប្រទេសអូស្ត្រាលីក៏ដូចជាទើបតែទទួលបានកម្មសិទ្ធិផ្នែកអចលនទ្រព្យនៅប្រទេសសិង្ហបុរីក្នុងពេលថ្មីៗនេះដែរ។
បើយោងទៅតាមព័ត៌មានរបស់ក្រុមហ៊ុននោះនៅ Bloomberg ក្នុងរយៈពេល ៣០ ឆ្នាំកន្លងមកនេះក្រុមហ៊ុននេះបានរីកចម្រើន និងចូលរួមក្នុងការផលិតអាលុយមីញ៉ូម និងក្រណាត់ វិស័យទេសចរណ៍ វាយកូនហ្គោល ការអប់រំ អចលនទ្រព្យ ស្រា ហិរញ្ញវត្ថុ និងអាកាសចរណ៍។
សម្រាប់លោកឧកញ៉ា រិទ្ធី ការមានការគាំទ្រពីអ្នកឯកទេសក្នុងការអភិវឌ្ឍនេះគឺជាការចាំបាច់សម្រាប់ការជោគជ័យ។
លោកបានមានប្រសាសន៍ថា៖ «ទាំងនេះហើយបានជាយើងបានចំណាយពេលយ៉ាងច្រើនក្នុងការស្វែងរកដៃគូអភិវឌ្ឍ។ Nanshan Group គឺល្អណាស់ព្រោះពួកគេមានរបៀបជំនួញស្រដៀងគ្នាក៏ដូចជាចំណាប់អារម្មណ៍ខុសៗពីគ្នា»។ ដោយលោកបានសំដៅទៅលើការរីកចម្រើនបន្ថែមនៃផលប័ត្រ (Portfolio) របស់ Worldbridge៕
ប្រភព: ភ្នំពេញប៉ុស្តិ៍