ក្រុមអ្នកជំនាញក្នុងវិស័យអចលនទ្រព្យ បាននិយាយថា កម្ពុជាកំពុងប្រឈមនឹងកង្វះខាតធនធានមនុស្សសម្រាប់វិស័យអចលនទ្រព្យយ៉ាងច្រើន ខណៈវិស័យនេះកំពុងរីកចម្រើននាមួយទសវត្សរ៍ចុងក្រោយនេះ។
លោក ចេង ខេង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងក្នុងពិធីបើកវគ្គបណ្តុះបណ្តាលស្តីអំពីជំនាញវាយតម្លៃ និងភ្នាក់ងារអចលនវត្ថុ កាលពីពេលថ្មីៗនេះថា ការរីកចម្រើននារយៈប៉ុន្មានឆ្នាំចុងក្រោយនេះធ្វើឲ្យកម្ពុជាជួបនឹងការខ្វះខាតធនធានមនុស្សដែលមានជំនាញក្នុងវិស័យអចលនទ្រព្យយ៉ាងច្រើន។ លោកបន្តថា កម្ពុជានៅត្រូវការធនធានមនុស្សច្រើនសម្រាប់ធ្វើការងារក្នុងជំនាញពាក់ព័ន្ធនឹងវិស័យអចលនទ្រព្យ ព្រោះកន្លងមកនៅកម្ពុជាមិនមានសាកលវិទ្យាល័យណាបានធ្វើការបណ្តុះបណ្តាលលើជំនាញនេះទេ។
លោកបានថ្លែងថា៖ «វិស័យអចលនទ្រព្យត្រូវការធនធានមនុស្សដែលមានសមត្ថភាពច្បាស់លាស់ ទើបអាចធ្វើការងារនេះបាន ពីព្រោះការងារនេះភាគច្រើនធ្វើជាមួយឧត្តមមនុស្ស (អ្នកមានប្រាក់ច្រើន)។ លោកបានបន្តថា៖ «ការរៀនជំនាញទាក់ទងនឹងវិស័យអចលនទ្រព្យ គឺជាការរៀនអំពីរបៀបរកលុយ។ ការដែលយើងរៀនក្នុងសាលាទទួលបានចំណាត់ថ្នាក់លេខ ១ រៀងរាល់ឆ្នាំ គឺមិនប្រាកដថា នៅពេលចេញពីសាលាទៅអាចរកលុយបានលេខ ១ រាល់ឆ្នាំទេ»។
លោកព្រមានថា៖ «រៀននៅទីនេះគឺដើម្បីយកចំណេះដឹងនិងសមត្ថភាពជំនាញពិតប្រាកដទៅធ្វើការងារប្រកបដោយវិជ្ជាជីវៈ គឺមិនមែនធ្វើខុសវិជ្ជាជីវៈនោះទេ។ អ្នកធ្វើខុសវិជ្ជាជីវៈ និងក្រមសីលធម៌ម្នាក់អាចធ្វើឲ្យប៉ះពាល់ដល់វិស័យទាំងមូល»។
និយាយសំដៅដល់សិក្ខាកាមដែលចូលរួមវគ្គបណ្តុះបណ្តាលខាងលើលោក ចេង ខេង បានអះអាងថា ប្រសិនបើសិក្ខាកាមដែលចូលសិក្សាក្នុងវគ្គបណ្តុះបណ្តាលនេះទទួលបាននិទ្ទេសល្អក្នុងការសិក្សា និងបានហាត់ការងារនៅក្រុមហ៊ុនអចលនទ្រព្យណាមួយ ហើយក្រុមហ៊ុននោះទទួលស្គាល់ថា ជាមនុស្សយកចិត្តទុកដាក់នឹងការងារ និងមានសមត្ថភាពនោះ លោកធានានឹងជួយស្វែងរកការងារធ្វើជូនដោយអាចនឹងអាចទទួលបានប្រាក់ខែចន្លោះពី ២៥០-៥០០ ដុល្លារ។
លោក សន សៀប នាយកក្រុមហ៊ុន ឃី រៀលអេស្ទេត ដែលជាគ្រូបង្គោលនៅក្នុងវគ្គបណ្តុះបណ្តាលនោះបានប្រាប់ថា វគ្គបណ្តុះបណ្តាលនេះបានផ្តោតលើជំនាញវាយតម្លៃនិងធ្វើជាភ្នាក់ងារអចលនទ្រព្យដោយវគ្គសិក្សានេះមានចំនួន ៤ ក្រេឌីត។ លោកបានបន្តថា បន្ទាប់ពីបញ្ចប់វគ្គសិក្សានេះសិក្ខាកាមនឹងអាចអាចយល់ដឹងអំពីមូលដ្ឋានគ្រឹះនៃការវាយតម្លៃអចលនវត្ថុ។
លោកបានថ្លែងថា៖ «ខ្ញុំគិតថា សម្រាប់សិក្ខាកាមដែលចង់បើកក្រុមហ៊ុនដោយខ្លួនឯងនោះ គេគួរតែធ្វើការយកបទពិសោធមួយឆ្នាំ ឬពីរឆ្នាំទៀត បន្ទាប់ពីបញ្ចប់សិក្សាវគ្គនេះ»។
ប្រធានគ្រប់គ្រងទូទៅក្រុមហ៊ុន អេស៊ា រៀលអេស្ទេត លោក ប៉ូ អ៊ាវគង់ ទទួលស្គាល់ថា ដោយសារសេដ្ឋកិច្ចរីកចម្រើនបានធ្វើឲ្យផ្នែកអចលនទ្រព្យ និងសំណង់មានការរីកចម្រើនជាហេតុធ្វើឲ្យកម្ពុជាជួបប្រទះនូវកង្វះធនធានមនុស្សទាក់ទងនឹងជំនាញអចលនទ្រព្យ រួមទាំងអ្នកបច្ចេកទេសផ្នែកសំណង់ផងដែរ។ លោកបានបន្តថា ការកសាងធនធានមនុស្សទាមទាររយៈពេល ៤-៥ ឆ្នាំ ព្រមទាំងមានការសិក្សា និងគ្រូបណ្តុះបណ្តាលច្បាស់លាស់ ទើបធនធានមនុស្សដែលផលិតបានអាចយកមកប្រើប្រាស់មានគុណភាពល្អ។ លោកបានលើកឡើងថា ជាក់ស្តែងបទពិសោធរបស់លោកផ្ទាល់នៅពេលលោកជ្រើសរើសបុគ្គលិកយកមកធ្វើការ គឺពួកគេមិនអាចធ្វើការងារនេះបានល្អទេ ដែលតម្រូវឲ្យក្រុមហ៊ុនរបស់លោកត្រូវបណ្តុះបណ្តាលពួកគេរយៈពេលបីខែ និងឲ្យចុះអនុវត្តការងារជាក់ស្តែងចំនួនមួយឆ្នាំទៀត ទើបពួកគេអាចធ្វើការងារនេះបានដោយខ្លួនឯង។
លោកបានអះអាងថា៖ «អ្នកធ្វើការងារក្នុងវិស័យអចលនទ្រព្យត្រូវទាមទារនូវបទពិសោធច្បាស់លាស់ ទើបអាចធ្វើការងារនេះបាន ដោយមិនមែនគ្រាន់តែអង្គុយអានសៀវភៅហើយយល់ និងធ្វើការងារបាននោះទេ ព្រោះជំនាញនេះត្រូវការនូវការអនុវត្តជាក់ស្តែង»។ លោកបានបញ្ជាក់ថា៖ «នៅប្រទេសគេៗមានមហាវិទ្យាល័យទាក់ទងនឹងវិស័យនេះ ដោយការបណ្តុះបណ្តាលអាចមានរយៈពេល ៤ ឆ្នាំ។ ពួកគេរៀនផង អនុវត្តជាក់ស្តែងផង ប៉ុន្តែនៅប្រទេសយើង គឺត្រូវចំណាយពេលយូរតទៅទៀត ដើម្បីអភិវឌ្ឍធនធានមនុស្សក្នុងវិស័យនេះ ព្រោះកម្ពុជានៅខ្វះខាតប្រព័ន្ធព័ត៌មាន និងទិន្នន័យក្នុងវិស័យនេះច្រើន»។
លោក ឈួយ ប៊ុនឡេង ម្ចាស់សិប្បកម្ម ប៊ុនឡេង ក្រូម៉េ ដែលបានចូលរួមសិក្សាក្នុងវគ្គបណ្តុះបណ្តាលស្តីពីជំនាញវាយតម្លៃ និងភ្នាក់ងារអចលនវត្ថុ បានប្រាប់ថា លោកចាប់អារម្មណ៍នឹងវិស័យនេះយូរមកហើយ។ កន្លងមកឲ្យតែមានសិក្ខាសាលាពាក់ព័ន្ធនឹងវិស័យនេះលោកតែងតែចូលរួម ព្រោះលោកមានគោលបំណងចង់បើកក្រុមហ៊ុនរកស៊ីក្នុងវិស័យនេះ។ លោកបានបន្តថា វិស័យអចលនទ្រព្យជាវិស័យល្អ ព្រោះនៅលើពិភពលោកនេះអ្នកដែលជោគជ័យ ឬជាសេដ្ឋីភាគច្រើនចេញមកពីវិស័យអចលនទ្រព្យ។ ការចូលរៀនជំនាញនេះ គឺដោយសារលោកចង់ដឹងពីវិធីគ្រប់គ្រងវិស័យនេះ ព្រមទាំងចង់ចងបណ្តាញជាមួយអ្នកធ្វើការងារក្នុងវិស័យនេះផងដែរ។
លោកអះអាងថា៖ «ខ្ញុំគិតថា ការបណ្តុះបណ្តាលទាក់ទងនឹងវិស័យអចលនទ្រព្យគឺមានសារៈសំខាន់ណាស់ ព្រោះបើចង់ប្រកបមុខរបរអ្វីក៏ដោយយើងត្រូវតែមានចំណេះដឹងគ្រប់គ្រាន់ទាក់ទងនឹងវិស័យនោះ»៕
Source : Phnom Penh Post
